நிலா மன்னவனுக்கு
கடல் பெண்ணின்
தொடர் தூது - கடல் அலை
மன்னவனை எண்ணி
அவன் துணைக்காக ஏங்கி
விடும் பெருமூச்சு - கடல்காற்று
மன்னவனின் வெண்மைக்கு
தன்னவள் கொடுக்க
வைத்திருக்கும் அணி - ஆழ்கடல் முத்து
மன்னவனின் வருகைக்காய்
கத்திருந்து எண்ணிய
நாட்கள் - கரையின் மணற்துகள்
கடல் பெண்ணே
உன் நினைவுகளை
அலைகளாய் அனுப்புகிறாய்
அந்தோ இயற்கை
என்னும் கணவனுக்கு
தொடர்ந்து தூதனுப்புகிறாய்
பெண்மையை மதித்து
உன்னிடம் செவிமடுக்க
இல்லையே பொறுமையாய்
எண்ண அலைகள்
உள்ளே அழுத்த
வெடித்தாயோ சுனாமியாய்
இன்று நான்
ஜனித்த தினம்.
புது உடை
உடுத்த வைத்தேன்
இனிப்பு வாங்கி
உண்ண வைத்தேன்
சொந்தம் கூடி
மகிழ வைத்தேன்
எங்களுக்கு ஏன் கொண்டாட்டம்
என்ற கேள்வி வந்தது
அதற்கு பதிலாய்
என் புன்னகை வந்தது
ஆம் - இன்று நான் ஜனித்த தினம்
அது தானே என் தந்தை தாயாய்
நீங்கள் ஜனித்த தினம்!
விழியில்லா தோழிக்கு
ஒளியை பற்றி சந்தேகம்
மொழியில்லா தோழிக்கு
ஒலியை அறிய ஆர்வம்
வெப்பாய் சிகப்பு
குளிர்ச்சியாய் நீலம்
இலைதடமாய் பச்சை
மணல் உறுத்தலாய் பழுப்பு
விழியில்லா தோழிக்கு
ஒளி உணர்ந்த இன்பம்
மொழியில்லா தோழிக்கு
எப்படி தீர்ப்பேன் உன் சந்தேகம்?
